ਬਰਫਬਾਰੀ ‘ਚ ਫਸੇ ਹਜ਼ਾਰਾਂ ਵਾਹਨ, Manali-ਸੋਲਾਂਗਨਾਲਾ ਰੋਡ ‘ਤੇ 6 ਕਿਲੋਮੀਟਰ ਲੰਬਾ ਜਾਮ

ਸੈਲਾਨੀ ਸ਼ਹਿਰ ਮਨਾਲੀ ਦੇ ਨਾਲ ਲੱਗਦੇ ਪਲਚਨ, ਸੋਲਾਂਗਨਾਲਾ ਅਤੇ ਅਟਲ ਸੁਰੰਗ ‘ਚ ਸ਼ਾਮ ਤੋਂ ਹੀ ਭਾਰੀ ਬਰਫਬਾਰੀ ਹੋ ਰਹੀ ਹੈ। ਇਸ ਕਾਰਨ ਸੋਲਾਂਗਨਾਲਾ ਵੱਲ ਜਾਣ ਵਾਲੇ ਸੈਲਾਨੀਆਂ ਦੇ ਵਾਹਨ ਫਸ ਗਏ। ਬਰਫਬਾਰੀ ਦੀ ਤੀਬਰਤਾ ਨੂੰ ਦੇਖਦੇ ਹੋਏ ਪੁਲਿਸ ਟੀਮ ਸੋਲਾਂਗਨਾਲਾ ਪਹੁੰਚੀ ਅਤੇ ਇਥੇ ਫਸੇ ਵਾਹਨਾਂ ਨੂੰ ਹਟਾਉਣ ਦਾ ਕੰਮ ਸ਼ੁਰੂ ਕਰ ਦਿੱਤਾ।

ਪੁਲਿਸ ਵੱਲੋਂ ਸੈਲਾਨੀਆਂ ਨੂੰ ਸੁਰੱਖਿਅਤ ਬਾਹਰ ਕੱਢਿਆ ਜਾ ਰਿਹਾ ਹੈ। ਜਾਣਕਾਰੀ ਮੁਤਾਬਕ ਭਾਰੀ ਬਰਫਬਾਰੀ ਕਾਰਨ ਸੋਲੰਗਨਾਲਾ ਅਤੇ ਮਨਾਲੀ ਵਿਚਕਾਰ 1000 ਤੋਂ ਵੱਧ ਸੈਲਾਨੀ ਵਾਹਨ ਫਸੇ ਹੋਏ ਹਨ। ਸੜਕ ਤੇ ਕਰੀਬ 6 ਕਿਲੋਮੀਟਰ ਲੰਬਾ ਜਾਮ ਲੱਗਾ ਹੋਇਆ ਹੈ। ਵਾਹਨਾਂ ਦੇ ਕਾਰਨ ਸੜਕਾਂ ਜਾਮ ਹੋ ਗਈਆਂ ਅਤੇ ਪੁਲਿਸ ਨੂੰ ਕਾਫੀ ਜੱਦੋ-ਜਹਿਦ ਕਰਨੀ ਪੈ ਰਹੀ ਹੈ।

ਸੈਲਾਨੀ ਖੁਸ਼, ਪੁਲਿਸ ਚਿੰਤਤ

ਮਾਈਨਸ ਤਾਪਮਾਨ ‘ਚ ਪੁਲਿਸ ਕਰਮਚਾਰੀਆਂ ਨੂੰ ਕਾਫੀ ਮੁਸ਼ਕਿਲਾਂ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ। ਬਰਫਬਾਰੀ ਕਾਰਨ ਸੈਲਾਨੀ ਤਾਂ ਖੁਸ਼ ਹਨ, ਪਰ ਪੁਲਿਸ ਵਾਲਿਆਂ ਲਈ ਇਹ ਕਾਫੀ ਚੁਣੌਤੀਪੂਰਨ ਹੈ। ਅੱਜ ਜ਼ਿਲ੍ਹਾ ਪ੍ਰਸ਼ਾਸਨ ਵੱਲੋਂ ਸੈਲਾਨੀਆਂ ਨੂੰ ਸੋਲਾਂਗਨਾਲਾ ਤੱਕ ਹੀ ਭੇਜਿਆ ਗਿਆ। ਸ਼ਾਮ ਨੂੰ ਜਦੋਂ ਬਰਫ਼ਬਾਰੀ ਤੇਜ਼ ਹੋ ਗਈ ਤਾਂ ਪੁਲਿਸ ਨੇ ਸੈਲਾਨੀਆਂ ਨੂੰ ਸਮੇਂ ਸਿਰ ਜਗ੍ਹਾ ਛੱਡਣ ਦੀ ਅਪੀਲ ਕੀਤੀ।

ਹਜ਼ਾਰਾਂ ਵਾਹਨਾਂ ਦੀ ਭੀੜ ਕਾਰਨ ਜਾਮ

ਹਾਲਾਂਕਿ ਹਜ਼ਾਰਾਂ ਵਾਹਨਾਂ ਦੀ ਭੀੜ ਕਾਰਨ ਆਵਾਜਾਈ ਜਾਮ ਹੋ ਗਈ। ਅਜਿਹੇ ‘ਚ ਪੁਲਿਸ ਸਾਰੇ ਵਾਹਨਾਂ ਨੂੰ ਸੁਰੱਖਿਅਤ ਮਨਾਲੀ ਪਹੁੰਚਾਉਣ ‘ਚ ਲੱਗੀ ਹੋਈ ਹੈ। ਪ੍ਰਸ਼ਾਸਨ ਨੇ ਸੈਲਾਨੀਆਂ ਨੂੰ ਰੋਹਤਾਂਗ ਸੁਰੰਗ ਤੇ ਜਲੋੜੀ ਦੱਰੇ ਵੱਲ ਨਾ ਜਾਣ ਦੀ ਹਦਾਇਤ ਕੀਤੀ ਹੈ। ਬਰਫ਼ਬਾਰੀ ਕਾਰਨ ਕੁੱਲੂ ਅਤੇ ਲਾਹੌਲ ਵਿੱਚ ਕਰੀਬ 15 ਬੱਸਾਂ ਦੇ ਰੂਟ ਪ੍ਰਭਾਵਿਤ ਹੋਏ ਹਨ। ਸ਼ਿਮਲਾ ਦੇ ਨਾਰਕੰਡਾ ਵਿੱਚ ਵੀ ਬਰਫ਼ਬਾਰੀ ਹੋ ਰਹੀ ਹੈ। ਟਰੈਫਿਕ ਨੂੰ ਸਾਂਝ ਤੋਂ ਲੁਹਰੀ/ਸੁੰਨੀ ਰਾਹੀਂ ਸ਼ਿਮਲਾ ਵੱਲ ਮੋੜ ਦਿੱਤਾ ਗਿਆ ਹੈ।

ਕਸ਼ਮੀਰ ਦੇ ਕਈ ਇਲਾਕਿਆਂ ‘ਚ ਬਰਫਬਾਰੀ

ਹਿਮਾਚਲ ਪ੍ਰਦੇਸ਼ ਦੇ ਨਾਲ-ਨਾਲ ਕਸ਼ਮੀਰ ‘ਚ ਵੀ ਬਰਫਬਾਰੀ ਹੋ ਰਹੀ ਹੈ। ਸ਼ੁੱਕਰਵਾਰ ਨੂੰ ਕਸ਼ਮੀਰ ਘਾਟੀ ਦੇ ਕਈ ਇਲਾਕਿਆਂ ‘ਚ ਬਰਫਬਾਰੀ ਹੋਈ। ਜ਼ਿਆਦਾਤਰ ਇਲਾਕਿਆਂ ‘ਚ ਘੱਟੋ-ਘੱਟ ਤਾਪਮਾਨ ‘ਚ ਵਾਧਾ ਹੋਇਆ ਹੈ। ਅਧਿਕਾਰੀਆਂ ਦਾ ਕਹਿਣਾ ਹੈ ਕਿ ਪੱਛਮੀ ਗੜਬੜੀ ਦੇ ਆਉਣ ਕਾਰਨ ਸ਼ੁੱਕਰਵਾਰ ਨੂੰ ਜੰਮੂ-ਕਸ਼ਮੀਰ ‘ਚ ਬਰਫਬਾਰੀ ਹੋਈ।