IPL 2025: Abhishek-Klaasan ਦੀ ਕਮਾਲ ਦੀ ਬੱਲੇਬਾਜ਼ੀ, Lucknow ਟੂਰਨਾਮੈਂਟ ਤੋਂ ਬਾਹਰ

 ਲਖਨਊ ਸੁਪਰ ਜਾਇੰਟਸ ਨੂੰ ਆਈਪੀਐਲ 2025 ਵਿੱਚ ਇੱਕ ਹੋਰ ਹਾਰ ਦਾ ਸਾਹਮਣਾ ਕਰਨਾ ਪਿਆ।

ਆਈਪੀਐਲ 2025 ਦੇ 61ਵੇਂ ਮੈਚ ਵਿੱਚ, ਸਨਰਾਈਜ਼ਰਜ਼ ਹੈਦਰਾਬਾਦ ਨੇ ਲਖਨਊ ਸੁਪਰ ਜਾਇੰਟਸ ਵਿਰੁੱਧ ਆਸਾਨ ਜਿੱਤ ਦਰਜ ਕੀਤੀ। ਇਹ ਮੈਚ ਲਖਨਊ ਦੇ ਭਾਰਤ ਰਤਨ ਸ਼੍ਰੀ ਅਟਲ ਬਿਹਾਰੀ ਵਾਜਪਾਈ ਏਕਾਨਾ ਕ੍ਰਿਕਟ ਸਟੇਡੀਅਮ ਵਿੱਚ ਖੇਡਿਆ ਗਿਆ। ਜਿੱਥੇ ਸਨਰਾਈਜ਼ਰਜ਼ ਹੈਦਰਾਬਾਦ ਦੀ ਟੀਮ ਨੇ 206 ਦੌੜਾਂ ਦੇ ਟੀਚੇ ਦਾ ਪਿੱਛਾ ਕੀਤਾ ਅਤੇ ਸੀਜ਼ਨ ਵਿੱਚ ਆਪਣੀ ਚੌਥੀ ਜਿੱਤ ਹਾਸਲ ਕੀਤੀ। ਇਸ ਹਾਰ ਦੇ ਨਾਲ, ਲਖਨਊ ਸੁਪਰ ਜਾਇੰਟਸ ਦੇ ਪਲੇਆਫ ਵਿੱਚ ਪਹੁੰਚਣ ਦੇ ਸਾਰੇ ਮੌਕੇ ਖਤਮ ਹੋ ਗਏ, ਅਤੇ ਉਹ ਟੂਰਨਾਮੈਂਟ ਤੋਂ ਬਾਹਰ ਹੋ ਗਏ। ਇਹ ਇਸ ਸੀਜ਼ਨ ਵਿੱਚ ਲਖਨਊ ਦੀ 7ਵੀਂ ਹਾਰ ਹੈ।

ਲਖਨਊ ਸੁਪਰ ਜਾਇੰਟਸ ਨੇ ਬਣਾਈਆਂ 205 ਦੌੜਾਂ

ਸਨਰਾਈਜ਼ਰਜ਼ ਹੈਦਰਾਬਾਦ ਨੇ ਟਾਸ ਜਿੱਤ ਕੇ ਪਹਿਲਾਂ ਗੇਂਦਬਾਜ਼ੀ ਕਰਨ ਦਾ ਫੈਸਲਾ ਕੀਤਾ। ਲਖਨਊ ਸੁਪਰ ਜਾਇੰਟਸ ਨੇ 20 ਓਵਰਾਂ ਵਿੱਚ 7 ​​ਵਿਕਟਾਂ ਗੁਆ ਕੇ 205 ਦੌੜਾਂ ਬਣਾਈਆਂ। ਮਿਸ਼ੇਲ ਮਾਰਸ਼ ਅਤੇ ਏਡਨ ਮਾਰਕਰਾਮ ਨੇ ਪਹਿਲੀ ਵਿਕਟ ਲਈ 115 ਦੌੜਾਂ ਦੀ ਸਾਂਝੇਦਾਰੀ ਕੀਤੀ। ਮਿਸ਼ੇਲ ਮਾਰਸ਼ ਨੇ 65 ਦੌੜਾਂ ਅਤੇ ਏਡਨ ਮਾਰਕਰਾਮ ਨੇ 61 ਦੌੜਾਂ ਬਣਾਈਆਂ। ਇਸ ਤੋਂ ਬਾਅਦ ਨਿਕੋਲਸ ਪੂਰਨ ਨੇ 26 ਗੇਂਦਾਂ ਵਿੱਚ 173.07 ਦੇ ਸਟ੍ਰਾਈਕ ਰੇਟ ਨਾਲ 45 ਦੌੜਾਂ ਬਣਾਈਆਂ।

ਹਾਲਾਂਕਿ, ਵਿਚਕਾਰਲੇ ਓਵਰਾਂ ਵਿੱਚ, ਸਨਰਾਈਜ਼ਰਜ਼ ਦੇ ਗੇਂਦਬਾਜ਼ਾਂ ਨੇ ਨਿਯਮਤ ਅੰਤਰਾਲਾਂ ‘ਤੇ ਵਿਕਟਾਂ ਲੈ ਕੇ ਆਪਣੀ ਰਨ ਰੇਟ ਨੂੰ ਕੰਟਰੋਲ ਕੀਤਾ। ਈਸ਼ਾਨ ਮਲਿੰਗਾ ਸਨਰਾਈਜ਼ਰਜ਼ ਹੈਦਰਾਬਾਦ ਦਾ ਸਭ ਤੋਂ ਸਫਲ ਗੇਂਦਬਾਜ਼ ਸਨ। ਉਨ੍ਹਾਂ ਨੇ 4 ਓਵਰਾਂ ਵਿੱਚ 28 ਦੌੜਾਂ ਦੇ ਕੇ 2 ਵਿਕਟਾਂ ਲਈਆਂ। ਜਦੋਂ ਕਿ, ਹਰਸ਼ ਦੂਬੇ, ਹਰਸ਼ਲ ਪਟੇਲ ਤੇ ਨਿਤੀਸ਼ ਕੁਮਾਰ ਰੈਡੀ ਨੂੰ 1-1 ਸਫਲਤਾ ਮਿਲੀ।

19ਵੇਂ ਓਵਰ ਚ ਜਿੱਤਿਆ ਹੈਦਰਾਬਾਦ

ਜਵਾਬ ਵਿੱਚ, ਸਨਰਾਈਜ਼ਰਜ਼ ਹੈਦਰਾਬਾਦ ਨੇ ਹਮਲਾਵਰ ਸ਼ੁਰੂਆਤ ਕੀਤੀ। ਅਭਿਸ਼ੇਕ ਸ਼ਰਮਾ ਨੇ 20 ਗੇਂਦਾਂ ਵਿੱਚ 59 ਦੌੜਾਂ ਦੀ ਤੂਫਾਨੀ ਪਾਰੀ ਖੇਡੀ ਅਤੇ ਸ਼ੁਰੂਆਤ ਵਿੱਚ ਹੀ ਮੈਚ ਨੂੰ ਹੈਦਰਾਬਾਦ ਦੇ ਹੱਕ ਵਿੱਚ ਕਰ ਦਿੱਤਾ। ਈਸ਼ਾਨ ਕਿਸ਼ਨ ਦੇ ਨਾਲ, ਉਸਨੇ ਪਾਵਰਪਲੇ ਵਿੱਚ ਤੇਜ਼ੀ ਨਾਲ ਦੌੜਾਂ ਬਣਾਈਆਂ। ਹਾਲਾਂਕਿ, ਦਿਗਵੇਸ਼ ਰਾਠੀ ਨੇ 7.3ਵੇਂ ਓਵਰ ਵਿੱਚ ਅਭਿਸ਼ੇਕ ਨੂੰ ਆਊਟ ਕਰਕੇ ਲਖਨਊ ਨੂੰ ਕੁਝ ਰਾਹਤ ਦਿੱਤੀ। ਇਸ ਦੇ ਬਾਵਜੂਦ, ਸਨਰਾਈਜ਼ਰਜ਼ ਦੀ ਬੱਲੇਬਾਜ਼ੀ ਲਾਈਨਅੱਪ ਨੇ ਦਬਾਅ ਬਣਾਈ ਰੱਖਿਆ ਅਤੇ ਆਸਾਨੀ ਨਾਲ ਟੀਚਾ ਪ੍ਰਾਪਤ ਕਰ ਲਿਆ। ਇਸ਼ਾਨ ਕਿਸ਼ਨ ਨੇ 28 ਗੇਂਦਾਂ ਵਿੱਚ 35 ਦੌੜਾਂ ਦਾ ਯੋਗਦਾਨ ਪਾਇਆ। ਇਸ ਦੌਰਾਨ, ਹੇਨਰਿਕ ਕਲਾਸੇਨ (47 ਦੌੜਾਂ) ਅਤੇ ਕਾਮਿੰਦੂ ਮੈਂਡਿਸ (32 ਦੌੜਾਂ) ਨੇ ਟੀਮ ਨੂੰ ਜਿੱਤ ਦਿਵਾਈ। ਜਿਸ ਕਾਰਨ ਹੈਦਰਾਬਾਦ ਨੇ ਇਹ ਮੈਚ 6 ਵਿਕਟਾਂ ਨਾਲ ਜਿੱਤ ਲਿਆ।

ਲਖਨਊ ਦੀ ਟੀਮ ਲਈ ਮਾੜਾ ਸੀਜ਼ਨ

ਇਹ ਸੀਜ਼ਨ ਲਖਨਊ ਸੁਪਰ ਜਾਇੰਟਸ ਲਈ ਚੁਣੌਤੀਪੂਰਨ ਸੀ। ਰਿਸ਼ਭ ਪੰਤ ਅਤੇ ਡੇਵਿਡ ਮਿੱਲਰ ਦੀ ਮਾੜੀ ਫਾਰਮ ਟੀਮ ਨੂੰ ਲਗਾਤਾਰ ਪਰੇਸ਼ਾਨ ਕਰਦੀ ਰਹੀ। ਇਸ ਦੇ ਨਾਲ ਹੀ, ਨਿਕੋਲਸ ਪੂਰਨ ਵੀ ਸੀਜ਼ਨ ਦੀ ਚੰਗੀ ਸ਼ੁਰੂਆਤ ਤੋਂ ਬਾਅਦ ਕੁਝ ਖਾਸ ਨਹੀਂ ਕਰ ਸਕਿਆ। ਇਸ ਤੋਂ ਇਲਾਵਾ, ਲਖਨਊ ਦੀ ਗੇਂਦਬਾਜ਼ੀ, ਖਾਸ ਕਰਕੇ ਪਾਵਰਪਲੇ ਵਿੱਚ, ਇਸ ਸੀਜ਼ਨ ਵਿੱਚ ਸਭ ਤੋਂ ਖਰਾਬ ਰਹੀ, ਜਿਸਨੇ ਉਨ੍ਹਾਂ ਦੀਆਂ ਮੁਸ਼ਕਲਾਂ ਨੂੰ ਹੋਰ ਵਧਾ ਦਿੱਤਾ। ਮਯੰਕ ਯਾਦਵ ਵਰਗੇ ਗੇਂਦਬਾਜ਼ ਸੱਟ ਕਾਰਨ ਕੁਝ ਹੀ ਮੈਚ ਖੇਡ ਸਕੇ।