Asia Cup ਤੋਂ ਮੈਚ ਰੈਫਰੀ ਨੂੰ ਹਟਾਓ… ਹੱਥ ਨਾ ਮਿਲਾਉਣ ਤੋਂ ਬੌਖਲਾਏ ਪਾਕਿਸਤਾਨ ਨੇ ICC ਨੂੰ ਲਗਾਈ ਗੁਹਾਰ

ਟੀਮ ਇੰਡੀਆ ਦੇ ਖਿਡਾਰੀਆਂ ਦੇ ਹੱਥ ਨਾ ਮਿਲਾਉਣ ਦੀ ਘਟਨਾ ਤੋਂ ਬਾਅਦ, ਪਾਕਿਸਤਾਨ ਨੇ ICC ਨੂੰ ਮੈਚ ਰੈਫਰੀ ਬਾਰੇ ਸ਼ਿਕਾਇਤ ਕੀਤੀ ਹੈ।

ਜਦੋਂ ਟੀਮ ਇੰਡੀਆ ਨੇ ਹੱਥ ਨਹੀਂ ਮਿਲਾਇਆ, ਤਾਂ ਪਾਕਿਸਤਾਨ ਨੇ ICC ਦਾ ਦਰਵਾਜ਼ਾ ਖੜਕਾ ਦਿੱਤਾ। ਰਿਪੋਰਟਾਂ ਅਨੁਸਾਰ, PCB ਨੇ ICC ਨੂੰ ਅਪੀਲ ਕੀਤੀ ਹੈ ਅਤੇ ਏਸ਼ੀਆ ਕੱਪ ਤੋਂ ਭਾਰਤ-ਪਾਕਿਸਤਾਨ ਮੈਚ ਰੈਫਰੀ ਐਂਡੀ ਪਾਈਕ੍ਰਾਫਟ ਨੂੰ ਹਟਾਉਣ ਦੀ ਮੰਗ ਕੀਤੀ ਹੈ। ਪਾਕਿਸਤਾਨ ਨੇ ICC ਨੂੰ ਤੁਰੰਤ ਪ੍ਰਭਾਵ ਨਾਲ ਇਹ ਕਾਰਵਾਈ ਕਰਨ ਦੀ ਬੇਨਤੀ ਕੀਤੀ ਹੈ। 14 ਸਤੰਬਰ ਨੂੰ ਦੁਬਈ ਵਿੱਚ ਖੇਡੇ ਗਏ ਮੈਚ ਦੌਰਾਨ, ਭਾਰਤੀ ਖਿਡਾਰੀਆਂ ਨੇ ਪਾਕਿਸਤਾਨੀ ਟੀਮ ਨਾਲ ਹੱਥ ਨਹੀਂ ਮਿਲਾਇਆ ਸੀ। ਇਸ ਤੋਂ ਦੁਖੀ ਪਾਕਿਸਤਾਨ ਨੂੰ ਲੱਗਦਾ ਹੈ ਕਿ ਇਸ ਮਾਮਲੇ ਵਿੱਚ ਅਸਲ ਗਲਤੀ ਮੈਚ ਰੈਫਰੀ ਦੀ ਹੈ। ਅਤੇ, ਇਹੀ ਕਾਰਨ ਹੈ ਕਿ ਪਾਕਿਸਤਾਨ ਕ੍ਰਿਕਟ ਬੋਰਡ ਨੇ ICC ਤੋਂ ਉਸਨੂੰ ਹਟਾਉਣ ਦੀ ਮੰਗ ਕੀਤੀ ਹੈ।

PCB ਨੇ ICC ਨੂੰ ਮੈਚ ਰੈਫਰੀ ਤੋਂ ਹਟਾਉਣ ਦੀ ਕੀਤੀ ਮੰਗ

PCB ਨੇ ICC ਕੋਲ ਸ਼ਿਕਾਇਤ ਦਰਜ ਕਰਵਾਈ ਹੈ ਜਿਸ ਵਿੱਚ ਮੈਚ ਰੈਫਰੀ ਐਂਡੀ ਪਾਈਕ੍ਰਾਫਟ ‘ਤੇ ICC ਦੇ ਕੋਡ ਆਫ ਕੰਡਕਟ ਦੀ ਉਲੰਘਣਾ ਕਰਨ ਦਾ ਦੋਸ਼ ਲਗਾਇਆ ਹੈ। ਇਸ ਤੋਂ ਇਲਾਵਾ, ਇਹ ਕਿਹਾ ਗਿਆ ਹੈ ਕਿ ਮੈਚ ਰੈਫਰੀ ਕ੍ਰਿਕਟ ਦੀ ਭਾਵਨਾ ਸੰਬੰਧੀ ਐਮਸੀਸੀ ਦੇ ਕਾਨੂੰਨ ਨੂੰ ਬਣਾਈ ਰੱਖਣ ਵਿੱਚ ਵੀ ਅਸਫਲ ਰਹੇ ਹਨ। ਇਨ੍ਹਾਂ ਦਲੀਲਾਂ ਨੂੰ ਹਥਿਆਰ ਵਜੋਂ ਵਰਤਦੇ ਹੋਏ, ਪਾਕਿਸਤਾਨ ਕ੍ਰਿਕਟ ਬੋਰਡ ਨੇ ਮੈਚ ਰੈਫਰੀ ਖਿਲਾਫ ਮੋਰਚਾ ਖੋਲ੍ਹ ਦਿੱਤਾ ਹੈ।

ਕੀ ਫੈਸਲਾ ਲਵੇਗਾ ICC?

ਪਾਕਿਸਤਾਨ ਦੀ ਸ਼ਿਕਾਇਤ ਤੋਂ ਬਾਅਦ, ਹੁਣ ਸਾਰਿਆਂ ਦੀਆਂ ਨਜ਼ਰਾਂ ICC’ਤੇ ਹਨ। ਇਹ ਦੇਖਣਾ ਦਿਲਚਸਪ ਹੋਵੇਗਾ ਕਿ ਕ੍ਰਿਕਟ ਦੀ ਸਰਵਉੱਚ ਸੰਸਥਾ ਇਸ ਮਾਮਲੇ ਵਿੱਚ ਕੀ ਸਟੈਂਡ ਲੈਂਦੀ ਹੈ।

ਸਾਬਕਾ ਪਾਕਿਸਤਾਨੀ ਕ੍ਰਿਕਟਰਾਂ ਚੁੱਕ ਚੁੱਕੇ ਹਨ ICC ‘ਤੇ ਸਵਾਲ

ਹਾਲਾਂਕਿ, ਕੁਝ ਸਾਬਕਾ ਪਾਕਿਸਤਾਨੀ ਕ੍ਰਿਕਟਰ ਵੀ ਇਸ ਮੁੱਦੇ ‘ਤੇ ICC’ਤੇ ਸਵਾਲ ਉਠਾਉਂਦੇ ਵੇਖੇ ਗਏ ਹਨ। ਚਾਹੇ ਉਹ ਰਾਸ਼ਿਦ ਲਤੀਫ ਹੋਣ ਜਾਂ ਬਾਸਿਤ ਅਲੀ। ਭਾਰਤੀ ਖਿਡਾਰੀਆਂ ਦੀਆਂ ਕਾਰਵਾਈਆਂ ਤੋਂ ਨਾਰਾਜ਼ ਰਾਸ਼ਿਦ ਲਤੀਫ ਨੇ ਆਪਣੇ ਸੋਸ਼ਲ ਮੀਡੀਆ ਰਾਹੀਂ ਪੁੱਛਿਆ ਕਿ ICC ਕਿੱਥੇ ਹੈ? ਬਾਸਿਤ ਅਲੀ ਨੇ ਸਵੀਕਾਰ ਕੀਤਾ ਹੈ ਕਿ ਕਿਉਂਕਿ ICC ਦਾ ਬੌਸ ਭਾਰਤੀ ਹੈ, ਇਸ ਲਈ ਪਾਕਿਸਤਾਨ ਟੀਮ ਨਾਲ ਨਾ ਸਿਰਫ਼ ਏਸ਼ੀਆ ਕੱਪ ਵਿੱਚ ਸਗੋਂ ICC ਟੂਰਨਾਮੈਂਟਾਂ ਵਿੱਚ ਵੀ ਅਜਿਹਾ ਹੀ ਵਿਵਹਾਰ ਕੀਤਾ ਜਾਵੇਗਾ।

ਹੱਥ ਨਾ ਮਿਲਾਉਣ ਦੀ ਘਟਨਾ ਦੇ ਵਿਚਕਾਰ, ਭਾਰਤ ਨੇ ਦੁਬਈ ਵਿੱਚ ਖੇਡੇ ਗਏ ਮੈਚ ਵਿੱਚ ਪਾਕਿਸਤਾਨ ਨੂੰ 7 ਵਿਕਟਾਂ ਨਾਲ ਹਰਾਇਆ। ਪਾਕਿਸਤਾਨ ਨੇ ਭਾਰਤ ਲਈ 128 ਦੌੜਾਂ ਦਾ ਟੀਚਾ ਰੱਖਿਆ ਸੀ, ਜਿਸਨੂੰ ਉਸਨੇ 3 ਵਿਕਟਾਂ ਗੁਆ ਕੇ ਪ੍ਰਾਪਤ ਕੀਤਾ।