ਜੰਗ ਦੌਰਾਨ ਫਾਈਟਰ ਜੈੱਟ ਕਰੈਸ਼ ਹੋਣ ‘ਤੇ ਪਾਇਲਟ ਕਿਵੇਂ ਬਚਾਉਂਦੇ ਹਨ ਜਾਨ? ਸਾਬਕਾ ਹਵਾਈ ਫ਼ੌਜੀ ਨੇ ਦੱਸਿਆ

ਸ਼ੁੱਕਰਵਾਰ ਨੂੰ ਈਰਾਨੀ ਫੌਜ ਨੇ ਅਮਰੀਕੀ ਫਾਈਟਰ ਜੈੱਟ F-15E ਨੂੰ ਮਾਰ ਗਿਰਾਇਆ।

ਸ਼ੁੱਕਰਵਾਰ ਨੂੰ ਈਰਾਨੀ ਫੌਜ ਨੇ ਅਮਰੀਕੀ ਫਾਈਟਰ ਜੈੱਟ F-15E ਨੂੰ ਮਾਰ ਗਿਰਾਇਆ। ਇਸ ਘਟਨਾ ਵਿੱਚ ਜਹਾਜ਼ ਦੇ ਦੋ ਪਾਇਲਟਾਂ ਵਿੱਚੋਂ ਇੱਕ ਨੂੰ ਬਚਾ ਲਿਆ ਗਿਆ ਹੈ, ਜਦਕਿ ਦੂਜਾ ਲਾਪਤਾ ਹੈ। ਲਾਪਤਾ ਪਾਇਲਟ ਨੂੰ ਬਚਾਉਣ ਲਈ ਅਮਰੀਕੀ ਸੈਨਿਕ ਈਰਾਨੀ ਫੌਜ ਦੇ ਖਿਲਾਫ ਤੇਜ਼ੀ ਨਾਲ ਕਾਰਵਾਈ ਕਰ ਰਹੇ ਹਨ।ਈਰਾਨ ਨੇ ਪਾਇਲਟ ਨੂੰ ਫੜਨ ਜਾਂ ਮਾਰਨ ਲਈ ਇਨਾਮ ਰੱਖਿਆ ਹੈ। ਇਸ ਦੌਰਾਨ ਇੱਕ ਸਾਬਕਾ ਹਵਾਈ ਸੈਨਾ ਪਾਇਲਟ ਅਤੇ ਇੱਕ ਬਚਾਅ ਕਰਮੀ ਨੇ ਏ.ਐਫ.ਪੀ. ਨੂੰ ਦੱਸਿਆ ਕਿ ਦੁਸ਼ਮਣ ਦੀ ਸਰਹੱਦ ਦੇ ਪਿੱਛੇ ਕਿਸੇ ਨੂੰ ਛਿਪਾਉਣ, ਜਿਉਂਦਾ ਰਹਿਣ ਅਤੇ ਉੱਥੋਂ ਸੁਰੱਖਿਅਤ ਬਾਹਰ ਕੱਢਣ ਲਈ ਕੀ-ਕੀ ਕਰਨਾ ਪੈਂਦਾ ਹੈ।

ਦਰਅਸਲ, ਰਿਟਾਇਰਡ ਬ੍ਰਿਗੇਡੀਅਰ ਜਨਰਲ ਹਿਊਸਟਨ ਕੈਂਟਵੈੱਲ ਨੇ ਕਿਹਾ, “ਜਦੋਂ ਫਾਈਟਰ ਜੈੱਟ ‘ਤੇ ਹਮਲੇ ਹੁੰਦੇ ਹਨ ਤਾਂ ਪਾਇਲਟ ਸੋਚਦੇ ਹਨ— ਹੇ ਰੱਬਾ, ਮੈਂ ਦੋ ਮਿੰਟ ਪਹਿਲਾਂ ਇੱਕ ਲੜਾਕੂ ਜਹਾਜ਼ ਵਿੱਚ ਸੀ, 500 ਮੀਲ ਪ੍ਰਤੀ ਘੰਟੇ ਦੀ ਰਫ਼ਤਾਰ ਨਾਲ ਉੱਡ ਰਿਹਾ ਸੀ, ਅਤੇ ਇੱਕ ਮਿਜ਼ਾਈਲ ਫਟ ਗਈ, ਬਿਲਕੁਲ ਤੁਹਾਡੇ ਸਿਰ ਤੋਂ 15 ਫੁੱਟ ਦੀ ਦੂਰੀ ‘ਤੇ।”

ਸਿਖਲਾਈ ਦੌਰਾਨ ਦਿੱਤੀ ਜਾਂਦੀ ਹੈ ਜਾਣਕਾਰੀ

ਕੈਂਟਵੈੱਲ ਕੋਲ ਇਰਾਕ ਅਤੇ ਅਫ਼ਗਾਨਿਸਤਾਨ ਦੇ ਉੱਪਰ ਮਿਸ਼ਨਾਂ ਸਮੇਤ 400 ਘੰਟਿਆਂ ਦਾ ਲੜਾਕੂ ਉਡਾਣ ਦਾ ਤਜਰਬਾ ਹੈ। ਉਨ੍ਹਾਂ ਦੱਸਿਆ ਕਿ ਪਾਇਲਟ ਨੂੰ ਇਸ ਦੇ ਲਈ ਸਿਖਲਾਈ ਦੌਰਾਨ ਸਭ ਕੁਝ ਦੱਸਿਆ ਜਾਂਦਾ ਹੈ, ਜਿਸ ਨੂੰ SERE (Survival, Evasion, Resistance, and Escape – ਸਰਵਾਈਵਲ, ਇਵੇਜ਼ਨ, ਰੇਸਿਸਟੈਂਸ ਅਤੇ ਐਸਕੇਪ) ਵਜੋਂ ਜਾਣਿਆ ਜਾਂਦਾ ਹੈ। ਪਾਇਲਟ ਪੈਰਾਸ਼ੂਟ ਰਾਹੀਂ ਜ਼ਮੀਨ ‘ਤੇ ਉਤਰਨ ਤੋਂ ਪਹਿਲਾਂ ਹੀ ਸਰਗਰਮ ਹੋ ਜਾਂਦਾ ਹੈ।

ਕਦੋਂ ਅਤੇ ਕਿੱਥੇ ਜਾਣਾ ਹੈ?

ਇਸ ਦੌਰਾਨ ਜਦੋਂ ਪਾਇਲਟ ਜ਼ਮੀਨ ਵੱਲ ਆ ਰਹੇ ਹੁੰਦੇ ਹਨ, ਤਾਂ ਉਨ੍ਹਾਂ ਨੂੰ ਇਹ ਗੱਲ ਚੰਗੀ ਤਰ੍ਹਾਂ ਪਤਾ ਲੱਗ ਜਾਂਦੀ ਹੈ ਕਿ ਉਹ ਕਿੱਥੇ ਜਾ ਰਹੇ ਹਨ ਅਤੇ ਕਿਹੜੀ ਜਗ੍ਹਾ ਜਾਣ ਤੋਂ ਬਚ ਸਕਦੇ ਹਨ। ਹਾਲਾਂਕਿ, ਉਨ੍ਹਾਂ ਇਹ ਵੀ ਦੱਸਿਆ ਕਿ ਪੈਰਾਸ਼ੂਟ ਰਾਹੀਂ ਜ਼ਮੀਨ ‘ਤੇ ਉਤਰਨ ਸਮੇਂ ਪੈਰ, ਗਿੱਟੇ ਅਤੇ ਲੱਤ ਵਿੱਚ ਸੱਟ ਲੱਗਣ ਦਾ ਖ਼ਤਰਾ ਬਣਿਆ ਰਹਿੰਦਾ ਹੈ।

ਉਹ ਕਿੱਥੇ ਛਿਪ ਸਕਦੇ ਹਨ?

ਕੈਂਟਵੈੱਲ ਨੇ ਦੱਸਿਆ ਕਿ ਜ਼ਮੀਨ ‘ਤੇ ਉਤਰਨ ਤੋਂ ਬਾਅਦ ਪਾਇਲਟ ਸਭ ਤੋਂ ਪਹਿਲਾਂ ਸਥਿਤੀ ਦਾ ਜਾਇਜ਼ਾ ਲੈਂਦੇ ਹਨ ਅਤੇ ਪਤਾ ਲਗਾਉਂਦੇ ਹਨ ਕਿ ਉਹ ਕਿਸ ਹਾਲਤ ਵਿੱਚ ਹਨ। ਕੀ ਉਹ ਹਿੱਲ-ਜੁੱਲ ਸਕਦੇ ਹਨ ਜਾਂ ਚੱਲ-ਫਿਰ ਸਕਦੇ ਹਨ? ਇਸ ਤੋਂ ਬਾਅਦ ਪਾਇਲਟ ਇਹ ਪਤਾ ਲਗਾਉਂਦੇ ਹਨ ਕਿ ਉਹ ਕਿੱਥੇ ਹਨ, ਕੀ ਉਹ ਦੁਸ਼ਮਣ ਦੀ ਸਰਹੱਦ ਦੇ ਪਿੱਛੇ ਹਨ, ਉਹ ਕਿੱਥੇ ਛਿਪ ਸਕਦੇ ਹਨ ਅਤੇ ਉਹ ਕਿਵੇਂ ਸੰਪਰਕ ਕਰ ਸਕਦੇ ਹਨ।

ਜਿੰਨਾ ਚਿਰ ਸੰਭਵ ਹੋ ਸਕੇ, ਪਾਇਲਟ ਦੁਸ਼ਮਣ ਦੇ ਚੁੰਗਲ ਵਿੱਚ ਫਸਣ ਤੋਂ ਬਚਣ ਦੀ ਕੋਸ਼ਿਸ਼ ਕਰਦਾ ਹੈ। ਜੇਕਰ ਉਹ ਰੇਗਿਸਤਾਨੀ ਇਲਾਕੇ ਵਿੱਚ ਹੋਵੇ, ਤਾਂ ਉਹ ਪਾਣੀ ਲੱਭਣ ਦੀ ਕੋਸ਼ਿਸ਼ ਕਰਦਾ ਹੈ। ਇਸ ਦੌਰਾਨ ਉੱਚ ਸਿਖਲਾਈ ਪ੍ਰਾਪਤ ਸੈਨਿਕ ਅਤੇ ਬਚਾਅ ਟੀਮਾਂ ਖੋਜ ਮੁਹਿੰਮ ਵਿੱਚ ਜੁਟ ਜਾਂਦੀਆਂ ਹਨ ਅਤੇ ਹਰ ਸੰਭਵ ਤਰੀਕੇ ਨਾਲ ਉਸ ਨੂੰ ਲੱਭਣ ਦਾ ਯਤਨ ਕਰਦੀਆਂ ਹਨ, ਜਿਸ ਨਾਲ ਲਾਪਤਾ ਪਾਇਲਟ ਨੂੰ ਮਾਨਸਿਕ ਸ਼ਾਂਤੀ ਮਿਲਦੀ ਹੈ।

ਕੈਂਟਵੈੱਲ ਨੇ ਦੱਸਿਆ ਕਿ ਫਾਈਟਰ ਜੈੱਟ ਕਰੈਸ਼ ਹੋਣ ਤੋਂ ਬਾਅਦ ਪਾਇਲਟ ਦੀ ਪਹਿਲੀ ਤਰਜੀਹ ਜ਼ਮੀਨ ‘ਤੇ ਸੁਰੱਖਿਅਤ ਉਤਰਨਾ ਅਤੇ ਉਸ ਤੋਂ ਬਾਅਦ ਕਿਸੇ ਸੁਰੱਖਿਅਤ ਥਾਂ ‘ਤੇ ਛਿਪਨਾ ਹੁੰਦਾ ਹੈ। ਕਿਉਂਕਿ, ਉਹ ਫੜਿਆ ਨਹੀਂ ਜਾਣਾ ਚਾਹੁੰਦਾ ਅਤੇ ਅਜਿਹੀ ਜਗ੍ਹਾ ‘ਤੇ ਪਹੁੰਚਣਾ ਚਾਹੁੰਦਾ ਹੈ, ਜਿੱਥੋਂ ਉਸ ਨੂੰ ਸੁਰੱਖਿਅਤ ਬਾਹਰ ਕੱਢਿਆ ਜਾ ਸਕੇ।