“MF Gabhru” ਗਾਣੇ ‘ਤੇ ਨਵਜੋਤ ਸਿੱਧੂ ਨੇ ਸ਼ੇਅਰ ਕੀਤੀ ਰੀਲ, ਕੁੜਤਾ-ਚਾਦਰਾ ਤੇ ਕੈਂਠਾ ਪਾਏ ਆਏ ਨਜ਼ਰ

ਨਵਜੋਤ ਸਿੱਧੂ ਨੇ ਆਪਣੇ ਸੋਸ਼ਲ ਮੀਡੀਆ ਅਕਾਊਂਟ ਇੰਸਟਾਗ੍ਰਾਮ ‘ਤੇ ਇੱਕ ਰੀਲ ਪੋਸਟ ਕੀਤੀ ਹੈ।

ਸਾਬਕਾ ਕ੍ਰਿਕਟਰ ਨਵਜੋਤ ਸਿੰਘ ਸਿੱਧੂ ਇਸ ਸਮੇਂ ਇੰਡੀਅਨ ਪ੍ਰੀਮਿਅਰ ਲੀਗ ‘ਚ ਕੁਮੈਂਟਰੀ ਕਰਦੇ ਹੋਏ ਨਜ਼ਰ ਆ ਰਹੇ ਹਨ। ਹਿੰਦੀ ਦੇ ਨਾਲ-ਨਾਲ ਉਹ ਪੰਜਾਬੀ ‘ਚ ਵੀ ਕੁਮੈਂਟਰੀ ਕਰ ਰਹੇ ਹਨ। ਫੈਂਸ ਵੱਲੋਂ ਉਨ੍ਹਾਂ ਦੀ ਪੰਜਾਬੀ ਕੁਮੈਂਟਰੀ ਨੂੰ ਬਹੁਤ ਪਸੰਦ ਕੀਤਾ ਜਾ ਰਿਹਾ ਹੈ, ਸ਼ਾਇਰਾਨਾ ਅੰਦਾਜ਼ ਦੇ ਨਾਲ-ਨਾਲ, ਉਹ ਕੁਮੈਂਟਰੀ ‘ਚ ਆਪਣੀਆਂ ਮਜ਼ਾਕੀਆਂ ਟਿੱਪਣੀਆਂ ਨਾਲ ਵੀ ਛਾਏ ਹੋਏ ਹਨ। ਹਾਲਾਂਕਿ, ਇਸ ਸਭ ਦੇ ਵਿਚਕਾਰ ਉਹ ਸੋਸ਼ਲ ਮੀਡੀਆ ‘ਤੇ ਅਲੱਗ ਹੀ ਅੰਦਾਜ਼ ‘ਚ ਨਜ਼ਰ ਆ ਰਹੇ ਹਨ।

ਨਵਜੋਤ ਸਿੱਧੂ ਨੇ ਆਪਣੇ ਸੋਸ਼ਲ ਮੀਡੀਆ ਅਕਾਊਂਟ ਇੰਸਟਾਗ੍ਰਾਮ ‘ਤੇ ਇੱਕ ਰੀਲ ਪੋਸਟ ਕੀਤੀ ਹੈ, ਜਿਸ ‘ਚ ਉਹ ਰਵਾਇਤੀ ਕੁੜਤਾ-ਚਾਦਰਾ ਤੇ ਉੱਪਰ ਇੱਕ ਜੈਕਟ ਤੇ ਗੱਲ ‘ਚ ਕੈਂਠਾ ਪਾਏ ਹੋਏ ਦਿਖਾਈ ਦੇ ਰਹੇ ਹਨ। ਉਨ੍ਹਾਂ ਨੇ ਇਸ ਪਹਿਰਾਵੇ ਨਾਲ ਰੀਲ ਸ਼ੇਅਰ ਕੀਤੀ ਹੈ, ਜਿਸ ‘ਚ ਮਸ਼ਹੂਰ ਪੰਜਾਬ ਗਾਇਕ ਕਰਨ ਔਜਲਾ ਦਾ “ਐਮਐਫ ਗੱਬਰੂ” ਗਾਣਾ ਚੱਲ ਰਿਹਾ ਹੈ। ਇਹ ਉਹੀ ਗਾਣਾ ਹੈ, ਜਿਸ ਕਾਰਨ ਕਰਨ ਔਜਲਾ ਨੂੰ ਵਿਵਾਦ ਝੱਲਣਾ ਪਿਆ ਸੀ, ਉਨ੍ਹਾਂ ਨੂੰ ਮਹਿਲਾ ਕਮਿਸ਼ਨ ਵੱਲੋਂ ਇਸ ਗਾਣੇ ਲਈ ਨੋਟਿਸ ਵੀ ਜਾਰੀ ਹੋ ਚੁੱਕਿਆ ਹੈ।

ਨਵਜੋਤ ਸਿੰਘ ਸਿੱਧੂ ਦੀ ਇਸ ਗਾਣੇ ਦੇ ਨਾਲ ਦੇਸੀ ਲੁੱਕ ‘ਚ ਪੋਸਟ ਕੀਤੀ ਗਈ ਰੀਲ ਨੂੰ ਫੈਨਸ ਵੱਲੋਂ ਬਹੁਤ ਹੀ ਪਸੰਦ ਕੀਤਾ ਜਾ ਰਿਹਾ ਹੈ। ਉਨ੍ਹਾਂ ਦੀ ਇਸ ਵੀਡੀਓ ਨੂੰ 4.50 ਲੱਖ ਤੋਂ ਵੱਧ ਲਾਈਕਸ ਮਿਲ ਚੁੱਕੇ ਹਨ। ਇਸ ਦੇ ਨਾਲ ਹੀ ਉਨ੍ਹਾਂ ਦੇ ਪ੍ਰਸ਼ੰਸਕਾਂ ਵੱਲੋਂ ਕੁਮੈਂਟ ਵੀ ਕੀਤੇ ਜਾ ਰਹੇ ਹਨ। ਸਾਬਕਾ ਭਾਰਤੀ ਸਪਿਨਰ ਤੇ ਮੌਜੂਦਾ ਪੰਜਾਬ ਦੇ ਰਾਜ ਸਭਾ ਸਾਂਸਦ ਹਰਭਜਨ ਸਿੰਘ ਨੇ ਟਿੱਪਣੀ ਕੀਤੀ ਹੈ- ਛਾਅ ਗਏ ਪਾਜੀ। ਸਿੱਧੂ ਦੀ ਪੋਸਟ ‘ਤੇ ਇੱਕ ਯੂਜ਼ਰ ਨੇ ਕੁਮੈਂਟ ਕੀਤਾ ਹੈ- ਉਮਰ ਸਿਰਫ਼ ਇੱਕ ਸੰਖਿਆ ਹੈ, ਸਿੱਧੂ ਹੁਣੇ ਹੀ ਆਪਣੇ ਟੀਨ ਏਜ਼ ‘ਚ ਸ਼ਾਮਲ ਹੋਏ ਹਨ। ਲਵ ਯੂ।