ਚੱਲਦੇ ਆਟੋ ‘ਚ ਲੁੱਟ ਦੀ ਕੋਸ਼ਿਸ਼, ਮਹਿਲਾ ਦੀ ਬਹਾਦਰੀ ਨਾਲ ਫੜੇ ਗਏ ਲੁਟੇਰੇ

ਬੀਤੀ ਸ਼ਾਮ ਇੱਕ ਔਰਤ ਆਟੋ ‘ਚ ਬੈਠ ਕੇ ਪਿੰਡ ਜਾ ਰਹੀ ਸੀ।

ਜਲੰਧਰ ‘ਚ ਫਿਲੌਰ-ਲੁਧਿਆਣਾ ਤੋਂ ਨੈਸ਼ਨਲ ਹਾਈਵੇਅ ‘ਤੇ ਚੱਲਦੇ ਆਟੋ ‘ਚ ਇੱਕ ਔਰਤ ਨੂੰ ਲੁੱਟਣ ਦੀ ਘਟਨਾ ਸਾਹਮਣੇ ਆਈ ਹੈ। ਜਿੱਥੇ ਆਟੋ ਚਾਲਕਾਂ ਦੇ ਭੇਸ ‘ਚ ਲੁਟੇਰਿਆਂ ਨੇ ਚੱਲਦ ਆਟੋ ‘ਚ ਔਰਤ ਨਾਲ ਲੁੱਟ ਕੀਤੀ। ਇਸ ਘਟਨਾ ਦੀ ਇੱਕ ਦਿਲ ਦਹਿਲਾ ਦੇਣ ਵਾਲੀ ਵੀਡੀਓ ਵੀ ਸਾਹਮਣੇ ਆਈ ਹੈ। ਜਿਸ ‘ਚ ਦੇਖਿਆ ਜਾ ਸਕਦਾ ਹੈ ਕਿ ਔਰਤ ਆਟੋ ਤੋਂ ਬਾਹਰ ਨਿਕਲਣ ਦੀ ਕੋਸ਼ਿਸ਼ ਕਰ ਰਹੀ ਹੈ, ਪਰ ਆਟੋ ਚਾਲਕ ਤੇਜ਼ ਰਫ਼ਤਾਰ ਨਾਲ ਆਟੋ ਚਲਾ ਰਿਹਾ ਹੈ।

ਇਸ ਦੌਰਾਨ, ਆਟੋ ਚਾਲਕ ਨੇ ਹਾਈਵੇਅ ‘ਤੇ ਇੱਕ ਕਾਰ ਨੂੰ ਵੀ ਟੱਕਰ ਮਾਰ ਦਿੱਤੀ। ਉਸੇ ਸਮੇਂ, ਆਟੋ ‘ਚ ਲਟਕਦੀ ਔਰਤ ਰਾਹਗੀਰਾਂ ਤੋਂ ਮਦਦ ਦੀ ਗੁਹਾਰ ਲਗਾ ਰਹੀ ਹੈ।

ਬੀਤੀ ਸ਼ਾਮ ਇੱਕ ਔਰਤ ਆਟੋ ‘ਚ ਬੈਠ ਕੇ ਪਿੰਡ ਜਾ ਰਹੀ ਸੀ। ਇਸ ਦੌਰਾਨ, ਆਟੋ ਸਵਾਰ ਤਿੰਨ ਲੁਟੇਰਿਆਂ ਨੇ ਰਸਤੇ ‘ਚ ਤੇਜ਼ ਹਥਿਆਰ ਕੱਢ ਕੇ ਔਰਤ ਨੂੰ ਲੁੱਟਣ ਦੀ ਕੋਸ਼ਿਸ਼ ਕੀਤੀ। ਪਰ ਔਰਤ ਨੇ ਬਹਾਦਰੀ ਦਿਖਾਈ ਅਤੇ ਆਪਣੇ ਆਪ ਨੂੰ ਬਚਾਉਣ ਲਈ ਆਟੋ ਤੋਂ ਬਾਹਰ ਲਟਕ ਗਈ, ਜਿਸ ਕਾਰਨ ਆਟੋ ਪਲਟ ਗਿਆ। ਲੋਕਾਂ ਦੀ ਮਦਦ ਨਾਲ 2 ਲੁਟੇਰਿਆਂ ਨੂੰ ਫੜ ਕੇ ਹਾਈਵੇਅ ਪੁਲਿਸ ਦੇ ਹਵਾਲੇ ਕਰ ਦਿੱਤਾ ਗਿਆ। ਜਦੋਂ ਕਿ ਉਨ੍ਹਾਂ ਦਾ ਇੱਕ ਸਾਥੀ ਮੌਕੇ ਤੋਂ ਭੱਜ ਗਿਆ।

ਰਿਮਾਂਡ ‘ਤੇ ਲੈ ਕੇ ਪੁੱਛਗਿੱਛ ਕਰਾਂਗੇ- ਐਸਐਚਓ

ਸਲੇਮ ਟਾਬਰੀ ਥਾਣੇ ਦੇ ਐਸਐਚਓ ਅੰਮ੍ਰਿਤਪਾਲ ਸਿੰਘ ਨੇ ਕਿਹਾ ਕਿ ਇਹ ਘਟਨਾ ਬਹੁਤ ਦੁਖਦਾਈ ਹੈ। ਇਸ ਸਮੇਂ ਲੋਕਾਂ ਦੀ ਮਦਦ ਨਾਲ ਦੋ ਬਦਮਾਸ਼ਾਂ ਨੂੰ ਫੜਿਆ ਗਿਆ ਹੈ। ਉਨ੍ਹਾਂ ਨੂੰ ਅਦਾਲਤ ਵਿੱਚ ਪੇਸ਼ ਕਰਕੇ ਰਿਮਾਂਡ ਲਿਆ ਜਾਵੇਗਾ, ਜਿਸ ਤੋਂ ਬਾਅਦ ਉਨ੍ਹਾਂ ਦੇ ਤੀਜੇ ਸਾਥੀ ਨੂੰ ਵੀ ਗ੍ਰਿਫ਼ਤਾਰ ਕੀਤਾ ਜਾਵੇਗਾ। ਪੀੜਤ ਔਰਤ ਦੇ ਅਨੁਸਾਰ, ਉਸਨੇ ਜਲੰਧਰ ਬਾਈਪਾਸ ਤੋਂ ਆਟੋ ਲਿਆ ਸੀ ਅਤੇ ਉਸਨੂੰ ਫਿਲੌਰ ਤੋਂ ਨਵਾਂ ਸ਼ਹਿਰ ਜਾਣ ਵਾਲੀ ਬੱਸ ਫੜਨੀ ਸੀ।